Par cure da "la Patrie dal Friûl" o presentìn culì une piçule guide par cognossi miôr cui ch’a son i Glemonats plui innomenâts. Sot vie o vin voltât par furlan lis biografiis di 45 personaçs, gjavadis fûr dal Dizionari Biografic Furlan (Dizionario Biografico Friulano, a cura di Gianni Nazzi, II ediz., Ribis, Basaldella, 1997). La sielte, fate par cuistions di spazi, e je colade sui personaçs, no in vite, di plui grande innomine. La traduzion e je stade realizade di Roberta Melchior. Un grazie al prof. Gianni Nazzi pe disponibilitât e pe preziose colaborazion.

ANTONINI GIUSEPPE

(Glemone 1876 - Udin 1962)

Artesan, inventôr. Al à vût colaborât cun Arturo Malignani. Amirât di T.A. Edison, al è stât autôr di cetantis piçulis invenzions e al à mudât ancje lis invenzions di chei altris. Al à bacilât di transmissions radio cence fîi, di argagns di cine e di mecaniche. Al à vinçût il Premi Epifanie tal 1962.

BALDISSERA/BALDISSERE VALENTINO

(Glemone 1840 - ibi 1906)

Predi, studiât, storic. Al à scrit massime su lis antigais di Glemone. Al à tal so patrimoni plui di sessante studis, che putrops a son stâts publicâts in "Pagjinis Furlanis" ("Pagine Friulane"). Al à vût scrit ancje par furlan.

BARAZZUTTI GIUSEPPE

(Glemone 1890 - ibi 1940)

Pitôr verist. Al à imparât il mistîr dal frescjant di so pari. Dal 1907 al 1911 al à frecuentât l’Academie di Vignesie dulà che al è stât scuelâr dal scultôr A. Del Zotto. Al dimorà a Sauris, For Disot, e in Val Resie, paîs che a inspirarin la sô produzion. Tai agns Vincj al è stât diretôr artistic dal mobilifici Fanton (Fantoni) di Glemone, culì al à metût in vore il disen di riscatâ il mobil rustic furlan secont i principis de Art dèco. Tai agns Trente al smirà, mediant diviersis iniziativis, di tornâ a valorizâ l’artesanât regjonâl. Il prin altâr de navade a man drete dal domo di Glemone al è stât realizât daûr di un so disen, dutune cu la decorazion de capele de Beade Vergjine dai agnui. Artist versatil, al à disegnât fiêrs batûts e furniments, al à comedât edificis e indi à progjetâts i internis. Al à inlustrât cun cualchi xilografie la composizion Flordicise di G. Lorenzoni. Al è stât l’ultin rapresentant dai frescjants glemonats. Al è presint tal museu di Udin.

BERTOSSI/BERTOS GIUSEPPE

(Glemone sec. XVIII)

Miedi, docent a Padue al scrivè l’opare Elementa medicinae praticae.

BIERTI OSVALDO

(Glemone 1859 - 1945)

Pitôr. Al è lât in Slovenie daûr di Francesco Fantoni. Par un jenfri al lavorà là di Francesco Barazzutti a Graz, daspò tant che jutori di Giacomo Brollo. I siei prins lavôrs tant che colaboradôr di Antonio Brollo a forin destinâts a lis glesiis di Prebold (1898), di Tabor dongje di Zalec (1899), di Vojnik (1899) e di Podgoj dongje di Ponikva. I frescs di dodis glesiis slovenis a son bielavuâl siei.

BILLIANI LUIGI

(Glemone 1851 - ibi 1896)

Speziâr, cultôr di studis storics. Al è stât framieç dai prins ae Universitât di Padue a stâ daûr ae chimiche farmaceutiche. Al scrusignà sore dal habitat de Vipera ammodytes.

BINI/BIN GIUSEPPE

(Vile di Var 1689 - Glemone 1773)

Predi, studiât, storic, poete. Al è stât a Milan e a Rome dulà che al à cirût e transcrit une cuantitât madornâl di documents sore il Friûl. Al à vivût ancje a Flambri e a Glemone dulà che al à dividût il so timp tra i impegns di pastôr e i studis favorîts. Tal 1872 al è stât publicât a Udin il so studi Crise dal Patriarcjât di Aquilee (Crisi del Patriarcato di Aquileia).

BROLLO ANTONIO

(Glemone 1868 - 1926)

Pitôr. Fî di Jacum. Al à frecuentât per siet agns la Academie di Vignesie. Dal 1890 al à frescjât, prime cul pari e dopo cun Osvaldo Bierti, siet glesiis in Slovenie.

BROLLO/BROILI BASILIO

(Glemone 1648 - Sanyüan 1704)

Missionari francescan, sinolig. Al jentrà tal convent dai fraris minôrs di Bassan tal 1666; tal 1674 al fo ordenât a Vignesie. Al partì pe Asie tal 1680. Al à vût lavorât a dilunc in Cine deventant vicjari apostolic dal Shensi. Al à compilât il prin grant dizionari cinês che al è lât atôr par un secul manoscrit e che al fo stampât, rengjât e sot un altri non, a Parîs dome che tal 1812. Al à scrit in cinês cualchi oparute di caratar religjôs.

BROLLO GIACOMO

(Glemone 1834 - 1918)

Pitôr. Arlêf di Giuseppe Bonitti, al à frecuntât par cuatri agns la Academie di Vignesie. Dal 1860 al à lavorât in Carinzie dulà che al à frescjât 14 glesiis adun cun Tommaso Fantoni e di bessôl ben 55, te dade di timp che e va dal 1862 al 1896.

CELETTO PIERINO (Mazzini)

(Glemone 1924 - Mont Nagrat 1944)

Student. Partigjan combatint te division Osôf-Friûl, al murì in combatiment. Medaie d’aur de Resistence.

CELOTTI/ CELOT ANTONIO

(Glemone 1850 - ibi 1904)

Nodâr, ministradôr civic, deputât liberâl-radicâl par Glemone tal 1898-1900.

CELOTTI/ CELOT FABIO

(Glemone 1841 - Sant Zorç di Noiâr 1913)

Miedi, ministradôr civic. Al è stât primari e daspò diretôr dal ospedâl di Udin. Al fo president de Academie di Udin. Al à publicât: La matematiche te medisine pratiche (La matematica nella medicina pratica) (AAU 1878-81); Nevrose antighe e nevrose moderne (Nevrosi antica e nevrosi moderna) (AAU 1890-93).

CELOTTI/CELOT LIBERALE

(Glemone 1810 c.)

Miedi. Al à esercitât a Tumieç, Sacîl e Vignesie. Cultôr di botaniche, al à lassât un erbari al Ort di Padue. Al à scrit cualchi publicazion di sfere mediche.

COMUZZO GEROLAMO

(Glemone 1591 - Lorenzago di Cjadovri, prob. post 1651)

Scultôr, intaiadôr, altarist. A son opare sô, di doi dai siei fîs e dai siei colaboradôrs, i altârs di len di For Disore, Glemone, Luvint di Davâr, Osôf, Sauris Disot e di cetancj paîs dal Cjadovri.

CRAGNOLINI/CRAGNOLIN ANTONIO

(Glemone 1809 - Klaghenfurt, Carinzie 1837)

Architet. Al à lavorât in Slovenie e Cravuazie. Al à progjetât ancje il teatri di Zagabrie.

D’ARONCO GIOBATTA

(Glemone1860 - Udin 1909)

Construtôr. Fî di Jeroni, fradi di Raimont e Virgjili. Al à comedât i edificis Malignani e al à fat sù la specule sul cuel dal cjiscjel di Udin.

D’ARONCO GIROLAMO

(Glemone 1825 - Udin 1909)

Impresari, progjetist. Specialist in manufats di ciment. Al à progjetât la glesie di Sant Marc di Merêt di Tombe e il santuari di Ribis di Reane.

D’ARONCO RAIMONDO TOMMASO

(Glemone 1857 - Sant Rem, Imperie 1932)

Architet, docent a Messine e a Napul, deputât liberâl par Glemone tal 1904-’09. Fî di Jeroni e fradi di Zuan Batiste e Virgjili. Al à studiât architeture a Viene e a Vignesie. Al è stât architet imperiâl di Istambul dal 1891 al 1908, dulà che al à restaurât Sante Sofie. Al è stât il progjetist uficiâl de Esposizion di Torin dal 1902, che intune cierte maniere e à inviât il liberty in Italie. I siei padilions a forin une novitât rivoluzionarie. Al è so il palaç comunâl di Udin dal gust ecletic, no redent de finece dai detais. Al è stât il plui grant architet dal "floreâl".

D’ARCONCO VIRGILIO

(Glemone 1862 - Udin 1907)

Progjetis. Fî di Jeroni e fradi di Zuan Batiste e di Raimont. Al disegnà riscjeladis floreâls.

DELL’ANGELO LEONARDO

(Glemone - ibi 1884)

Avocat, depuntât liberâl par Glemone tal 1876-’82.

DELL’ANGELO/DAL AGNUL LIBERALE

(Ospedâl, Glemone 1855 -Talmassons 1924)

Predi, gjornalist. Al à publicât a Udin tal 1887 la traduzion par furlan dai Carmina di pape Lion XIII; tal 1896 "Il lunari de la sossie furlane cu l’illustrazion dei Santuaris dal Friûl", il prin lunari furnît di fotografiis.

FANTONI/FANTON GIOVANNI

(Glemone 1867 - 1958)

Pitôr. In principi al à lavorât cul barbe Tomâs. Intant di chest garzonât al à eseguît la decorazion de glesie sucursâl a Šmiklav ob Dreti. A vegnirin daspò lis glesiis di Luèe ob Savinji (1897), di Lacja vas ob Dreti (ta sucursâl di Sv. Katerina na Gorici) (1898), di Ljubija dongje di Mozirje (glesie sucursâl di Sant Nicolau) (1900), di Skorno dongje Šoštanj (sucursâl di Sant Antoni) (1901), di Šmihel nad Mozirjem (parochiâl di Sant Micjêl) (1903), di Rovt sot la Menina Planina (sucursâl di S. Jošt), di Brezje dongje Mozirje (sucursâl di Sante Marie e di Sant Roc a Ronik) (1906).

FANTONI/FANTON LUCIANO

(Glemone 1881 - ibi 1967)

Avocat, ministradôr civic, om politic. Esponent dal mont catolic. Tal 1907 al è stât elet conseîr pe Provincie e, sot cheste vieste, si è stratignût dal vôt pes celebrazions dal cincuantenari de proclamazion di Rome capitâl. Sindic di Glemone, stant che al è restât tal so paîs daspò Cjaurêt, al fo per ducj i talians, informâts di maleman de sô condote, "il rineât sindic di Glemone". Tal 1919 al deventà president de Deputazion Provinciâl. In timp dal rezim fassist al à patît persecuzions. Deputât popolâr (1919-’26), al è stât declarât decjadût dal guvier fassist. Al jentrà tal Comitât di Liberazion Nazionâl. Daspò de vuere al è stât sindic di Glemone dal 1946 al ’63; rapresentant de Democrazie Cristiane a la Consulte (1945), deputât a la Constituent (1946-48), senadôr par dirit de prime legjislature republicane (1948-53). Al è stât un autonomist di chei cjalts.

FANTONI/FANTON TOMMASO (Ettore Tommaso)

(Glemone 1822 - Jamne, Konjice, Slovenie 1892)

Pitôr, indoratôr, intaiadôr. Daspò di vê studiât a Udin e a Vignesie, al à vût lavorât in Austrie e, soredut, in Slovenie dulà che al è lât a stâ. Al à frescjât di bessôl plui di trente glesiis e ancjemò uns cuindis in cubie cun G. Brollo te dade di timp che e va dal 1857 al 1891. Daûr di lui a son lâts in Slovenie, G. Brollo, il fradi di Tomâs, Zuan, daspò A. Brollo e O. Bierti. I lavôrs di Fanton si cjatin ancje in Friûl, in Austrie e adalgò.

FOSCHIANI GIUSEPPE

(Glemone 1848 - Feltri 1913)

Vescul di Belun e Feltri. Predi tal 1870, al è stât prefet dal Institût Tomadini di Udin e daspò pastôr a Pagnà, Glemone, Manzan dulà che al fo atîf in cjamp sociâl cul fondâ la Casse operarie. Consacrât vescul a Rome tal 1908, l’an daûr al cjapà sù la Diocese di Feltri-Belun, che i à dât gnove vitalitât spirtuâl e sociâl. Al à fondât il setemanâl "L’amì dal popul" ("L’amico del popolo"), al à fat cressi l’ativitât sociâl cul creâ diviersis societâts operariis e di jutori mutuâl. Al à publicât Il bon pastôr tes catacombis di Rome (Il buon pastore nelle catacombe di Roma) (Udin 1901); Lourdes e lis sôs maraveis (Lourdes e le sue meraviglie) (Vicenze 1908); La piovre verde e i siei tentacui (La piovra verde e i suoi tentacoli) (Belun 1913).

FRANCESCHINIS ANTONIO

(Glemone, sec. XV)

Nodâr, storic. Al è stât cancelîr dal Parlament de Patrie dal Friûl. Al à scrit De Carnica regione illustratio.

GRINEO MARCANTONIO

(Glemone, sec. XVI)

Leterât, umanist.

LISO LEONARDO

(Glemone 1855-1922)

Scultôr, insegnant. Daspò che di frut al veve fat il cjaliâr al à frecuentât la scuele serâl di plastiche. Jentrât te Academie di Vignesie al à otegnût il titul di professôr di sculture. Al è stât membri onorari de stesse instituzion. Artist fecont, al à lassât cetantis oparis a Padue, Udin e Vignesie.

LONDERO/LONDAR PIETRO (Pieri Piçul)

(Glemone 1913 - ibi 1986)

Predi, insegnant, tradutôr, scritôr. Dal 1940 al ’71 al è stât professôr tal Seminari di Udin. In cubie cun pre’ Checo Placerean (Francesco Placereani) al à voltât I faz, lis letaris dai apuestui e l’Apocalisse. Al è stât un colaboradôr atîf di "Int furlane". Autonomist impegnât, al è stât tra i fondadôrs dal Moviment Friûl e coautôr, tal 1967, de storiche Mozion dal clericât pe incressite sociâl in Friûl (Mozione del clero per lo sviluppo sociale del Friuli), dulà che si reclamavin i derits dal popul furlan.

LUC(C)ARDI VINCENZO

(Glemone 1808 - Rome 1876)

Scultôr. Al à studiât a la Academie di bielis arts di Vignesie. Sul inprin artist neoclassic, daspò sensibil a influencis veristichis. Al à otignût ambîts ricognossiments a Parîs, Florence e Viene. Al à insegnât a la academie di Sant Luche di Rome. Oparis a Udin: l’Aiace dal palaç dal muncipi e Il Rimuars di Cain (Il rimorso di Caino) dal museu; a Pradaman; a Rome: bust di Zuan Ricamadôr (Giovanni da Udine) pa la loze di Raffaello in Vatican e a Viene: Monument a Pietro Metastasio (Monumento a Pietro Metastasio) te glesie dai Minorits. Tal 1867 al è stât presint a la Esposizion universâl di Parîs. Al è stât a man cun G. Verdi.

MARCHETTI/MARCHET GIUSEPPE (Meni Parut, Pirli)

(Glemone 1902 - Udin 1966)

Predi, insegnant, lenghist, storiograf, leterât, storic e critic d’art. Al à studiât tal Seminari di Udin e consacrât tal 1925. Tal 1935 si è laureât in letaris classichis e modernis a la Catoliche di Milan, daspò che al veve cjapât la lauree in teologjie. In chel an instès al è stât mandât "volontari" in Abissinie tant che capelan militâr. Al à insegnât letaris tal Seminari, tal Liceu classic e tal Institût magjistrâl a Udin e a Tumieç. Tal 1944 al à patît il confin politic fassist. Daspò de vuere al è stât l’inspiradôr dal grop poetic Risultive. Al è stât il genius loci dal Friûl, il maître à penser dal Furlanentum: nissun nol à fat come lui pe sô tiere. Par agns al è stât l’anime dal ferbint setemanâl "Patrie dal Friûl" che al sostegnive l’autonomie regjonâl tun ambient in plen contrari. Cul 1961 fintremai a la muart, al à direzût la riviste "Sot la Nape". Al à coltât ancje il disen, inlustrant cualchi so libri, e la fotografie (il so archivi cun la catalogazion dal patrimoni di sculturis di len e des gleseutis votivis dal Friûl al è tal Museu di Udin). Al à scrit une fondamentâl gramatiche storiche de lenghe furlane; al à "discuvierzût" la sculture dal len furlane che fin a chel moment e jere stade lassade di bande de critiche d’art; al à tornât a lei la storie regjonâl cence condizionaments e preiudizis nazionalistics; ancje se nol jere un artist pûr al à scrit tun furlan esemplâr; nissun, ni prime ni dopo al à paronât la lenghe come lui. Une vore largje la sô produzion sore di gjornâi, periodics e rivistis. Premi Epifanie 1960. A so non a son intituladis cetantis scuelis e stradis par dut il Friûl.

MARTINA TARCISIO

(Ospedâl, Glemone 1887 - Verone 1961)

Stimatin. Missionari in Cine par 26 agns, al è stât prefet apostolic tal Hopei. Condanât a la galere a vite dai judiçs di Mao, al è stât liberât daspò cuatri agns di preson.

MULLIONE SEBASTIANO

(Glemone, sec. XVI)

Predi. Al è autôr di une croniche dal 1300 al 1517.

NICLI D’ANDREA LEA

(Glemone 1906 - ibi 1988)

Composidore di viers. E à scrit trê fassiculuts poetics: Il bosc si viest d’aur, Glemone e Conche Glemone ‘a ere (Udin 1982). Par talian e à scrit La profughe. Piçulis memoriis (La profuga. Piccole memorie) (Sant Denêl 1972).

OSTERMANN VALENTINO

(Glemone 1841 - Treviglio, Bergamo 1904)

Al è il pari dai studis di folclôr in Friûl. Al à lassât trê libris fondamentâi pe cognossince de culture furlane: Detulis furlanis (Proverbi friulani) (Udin 1876, 1995), Vilotis furlanis (Villotte friulane) (Udin 1892), La vite in Friûl. Usancis, costums, crodincis popolârs (La vita in Friuli. Usi, costumi, credenze popolari) (Udin 1894), tornâts a stampâ ducj e trê in agns resints. Al à colaborât cun assiduitât a lis "Pagjinis Furlanis" ("Pagine friulane"), che al à fondât cun altris, cuntune lungje schirie di contribûts, tant che lis liendis capitâls.

PERESSUTTI GINO

(Glemone 1883 - Padue 1940)

Architet. Al à progjetât Cinecittà, la Hollywood taliane. Tal n. 20 de riviste "Cinema" (25-4-1937) al à scrit in ce maniere che al à ideât e realizât la opare. Tal centri storic di Glemone al è un edifici disegnât di lui. Realizâts di lui i plans regolatôrs di putropis citâts italianis.

PERSA GIOVANNI BATTISTA

(Glemone, sec. XVII)

Zootecnic. Al à scrit un piçul tratât su l’art di tirâ sù i cjavai.

PITTINI/PITIN FILIBERTO

(Glemone 1920 - Milan 1997)

Inzegnîr. Daspò di une esperience di lavôr te industrie siderurgjiche e chimiche al è jentrât a la Pirelli dulà che tal 1974 al è deventât ministradôr delegât e in progrès vicepresident de Pirelli s.p.a.. Al jere dentri ancje tal diretîf de Assolombarde e de zonte de Confindustrie. Al è stât president de Cjamare di cumierç internazionâl - sezion italiane.

SIMONETTI DIEGO

(Glemone 1865 - Pise 1926)

Amirâl. Al à combatût in Cine cuintri i Boxers. Al è stât a cjâf dal stât maiôr de armade navâl taliane tal 1917. Al à direzût l’atac dal mâr cuintri i legjonaris di D’Annunzio che a vevin ocupât Rijeka.

SOATTI/SAUAT TOMMASO

(Glemone - Milan 1886)

Compositôr di viers, disegnadôr, insegnant. Al à studiât a la Academie des bielis arts di Vignesie. Al à insegnât a Milan. Dai siei viers par furlan tal periodic "Pagjinis Furlanis" ("Pagine friulane").

SPIRITO BULFONE (Wolfgang)

(Glemone, sec. XVI)

Architet militâr. Al à lavorât a Gurize tra il 1530 e il 1540. Cun buine probabilitât al fo l’autôr dal santuari dal Mont Sant, sdrumât, e dal palaç vescovîl di Triest.

URBANI PAOLO (Paulin Ban)

(Glemone 1911- ibi 2000)

Artesan, intaiadôr, disegnadôr, poet. Emigrant in Spagne, Venezuela e Svuizare e daspò in altris citâts talianis. Autoditat. In plui de puisie (Un sclip di puesie, Rosis carmìn e zalis, Cjaparai la mê anime, Scrivi di gnot) al à coltât la sculture e la piture. Al è ancje autôr di une comedie par fruts Il alt dai vecjos. Il Crist di len de glesie di Sant Roc di Glemone al è so.

VALE GIUSEPPE

(Glemone 1877 - Udin 1950)

Predi, erudît, storic, insegnant. Al è stât ordenât tal 1900. Al à insegnât latin e storie tal Seminari di Udin. Daspò al è stât cjaluni de metropolitane e diretôr de Biblioteche arciverscovîl. Al è stât inviât viers la ricercje storiche di V. Baldissera. Plui voltis al à pandût a Paschini il so displasê che tal ministeri parochiâl de peraule si bandonàs l’ûs de lenghe furlane. Al à scrit cetancj fassicui, saçs e monografiis: al è stât l’archîf vivent de storie gleseastiche furlane.

ZUCCHERI LUIGI

(Glemone 1904 - Vignesie 1974)

Pitôr. Nassût tune famee nobil furlane al à vivût pal plui a Sant Vît al Tiliment. Si è dedicât ae piture sot la direzion di Milesi e Martina. Al è stât definît "pitôr classic e venturât". Daspò de vuere si è imponût come pitôr di bestiis. "La sô palete di pitôr e fâs la parafrase, cun ironie picant, a la realtât contemporanie ricjapant lis distudadis gemis cromatichis de piture venite de fin dal Cincent. Cuant che al piture l’om, lu propon in vieste antieroiche, svuedât dal protagonisim rinassimentâl, stramudât tal so inmagjinari animalesc". (L. Perissinotto). Al à partecipât a la Bienâl di Vignesie. Oparis te Galerie di art moderne di Udin e di Vignesie e tal Museu civic di Pordenon.

Publicât cul contribût de Provincie di Udin.